香港新浪網 MySinaBlog
« 上一篇 | 下一篇 »
Winnie媽媽 | 10th Dec 2009 | 心肝寶貝貓咪~ | (1177 Reads)

1/12/2009 (星期二)晚鄰居太太放狗時突然見馬路中心有3隻個零月大的小貓BB被一架私家車剛剛車過,  大叫完...驚魂未定再望望,  Thanks god...3小BB仍然在馬路中心,  白色的比較壯健就自己好快跑回行人路, 而餘下的2隻就驚到唔識行...呆坐路中........鄰居太太即刻衝出路中心...Stop停晒黎緊既車, 再把牠們一一抱番入行人路~

鄰居太太冇養貓, 第1時間就想起我...結果我地在離馬路不遠的兩間村屋中, 一條好長好窄既隙縫度(得4-5吋闊) 看到牠們, 貓BB可能真的受驚...唔肯出黎, 只要我地一行近, 佢地就會驚叫同爬向更入更窄, 無法接觸牠們亦無計可施, 唯有放下食物同水在附近, 慢慢再諗方法!

貓BB剛剛經過生死邊緣和受驚, 如果有食物, 都應該唔會再走出馬路, 佢地起隙度暫時是安全的..........我拿了好幾罐罐頭給鄰居太太, 由佢暫時負責每日放下食物同水在附近, 希望能同貓BB混熟, 而我就四出向高人請教方法如何幫佢地......

同鄰居先生傾開...佢話記起早幾日曾經見過一條貓屍起馬路中心...估計大有可能係佢地貓媽媽...因為呢幾隻貓BB咁細冇理由唔跟住貓媽?   果日佢地走出馬路.....可能係認錯鄰居隻西施細狗係媽媽...又可能好肚餓想搵野食!

班BB都好醒目, 見人就即刻呢埋...但就有出黎食罐罐....問左高人, 佢話班BB咁輕, 個捕貓籠未必捉到, 但亦可一試... Or may be 考慮Call SPCA幫手, 當然係話D貓BB係自己既, 但不小心走左入隙縫度!! 不過大家都要番工, 就算行動都需要等到星期六下午,  但大家都擔心.....捉貓個過程會令貓B再次受驚or受傷.....

可能佢地係鄰居太太由馬路中心抱番入行人路, 又可能係每日都黎餵佢地,  似乎開始得到貓BB信任, 她可以企在一旁看牠們食野, 但只要一郁動or想行近, 貓BB就會即時走番入隙縫度........唉~我地都希望可以在一個最安全情況下捉到佢地~

4/12/2009 (星期5) 晚同鄰居終於成功的捉到果3隻貓BB啦,  我地襯BB走出黎食野時...靜雞雞包炒封左個隙縫入口, 即時一人捉一隻放入一早安排定既紙箱內, 可能佢地太驚...好努力保護自己...佢地好緊張同好惡, 鄰居因冇捉貓經驗, 結果佢地兩個都比貓BB咬到, 仲咬得好深流好多血, 之後還要去急症室打針.....起呢度代貓BB向鄰居夫婦致敬!!!

貓BB暫住我家...初步觀察, 有眼膠同貓瘟徵狀, 而Pat Pat 仲有潰爛, 情緒方面仲係好緊張,  係咁FEE!!!  相信要等佢地靜心休息....慢慢比時間安撫!!   WOO~大家終於有覺好瞓了....由Day One知道有呢班BB, 晚晚都失眠, 鄰居太太仲慘, 晚晚發惡夢, 我地大家都擔心佢地會再走出馬路比車車到, 而黎緊又番風會好凍, 佢地咁細又弱又冇媽媽...都唔知可以捱到幾多日???

來我家的第2天....經過照料, 已經冇流眼膠眼水, 冇貓瘟徵狀, 但仍然好驚好怕人~

黎我家5日啦~

6隻圓碌碌既眼仔開始認得我, 今朝食野時仲可以比我摸, 但當一有大聲或未望真我時, 佢地仍會好緊張係咁FEE....不過呢個進展我已經好滿意~

中間呢隻我估佢係大哥哥, 佢好照顧d細佬妹架...之前起隙縫度, 我地每次放下食物行開左, 佢就係第1隻走出黎4圍望..安全啦, 就叫d細佬妹出黎食, 當細佬妹食緊, 佢又會起附近保護..等到好安全佢自己先埋去食, 一路食佢會不時周圍望....有咩風吹草動就即刻會叫佢地閃.......

大哥哥......沙沙~ 斯文淡定, 雖然冇了媽媽, 而自己又細, 但就肩負照顧主弟妹責任...比個叻佢~

二妹......三色妹~ 之前塊面仔損左, 而家好番啦, 佢正一係為食妹黎架!!

細佬.......黑BB~ 佢好精靈同爛玩架, 已經開始肯玩波波啦~

昨夜下著大雨, 望出窗外...再望望籠中窩內呢3隻小貓BB, 牠們大難不死...跟住是否會有福?

唉~ 貓BB...知道你們小小年紀就經歷幾次大變, 心中的徨恐, 驚慌, 害怕一定未消, 但請你們放心, winnie媽媽會用愛令你們溫暖, 令你們安心放鬆!

希望之後能為你們尋家, 麻煩到時大家幫手啦~