香港新浪網 MySinaBlog
Winnie媽媽 | 18th Apr 2006 | 小天使~笨豬 | (4 Reads)

14/1/06

笨豬走左2日喇,原來個心係可以咁痛,起屋企因為有其他仔女陪我都還可以,但當自己一個時....一想起佢我d眼淚就係完全唔可以控制!

上天其實對我地不薄,起佢走果日我都可以陪足佢成日,我仲可以抱住佢同晒所有貓狗say goodbye,其實我係感覺到佢要走,但我亦知佢唔捨得我,所以我同佢講,你乖,你好叻仔,你唔使擔心媽咪,我會過得好好,你覺得攰就瞓覺喇,我一路抱到佢走前5分鐘,我放佢落籠,同佢蓋上毛巾,佢好舒服好安心咁,我就出左房一陣,番黎時佢就走左,好安祥我亦好安慰佢完全冇痛苦!

笨豬仔,原來我真係好鍚你,原來我真係好愛你,原來我真係好疼你,原來我真係好掛住你!!!!


Winnie媽媽 | 18th Apr 2006 | 小天使~矮腳虎 | (10 Reads)

今日我地比媽咪閙, 係好惡果隻, 嗚嗚~~~事關…..我又同矮腳虎打交~~~~~不過, 好彩今次人同狗都冇受傷, 佢話下次再係咁就唔同我地去街街玩…. 其實次次打交都係果個矮仔撩交打先架, 咁我都係還手啫~~~~唉, 不過媽咪話冇得傾, 總之一打交就個個都要罰, 最可憐咪就係金仔囉!!!!!

矮腳虎, 真係狗如其名, 佢係一隻白色既混種哥基, 雖然矮得得, 不過佢好惡架, 佢流浪果時都周圍同狗狗打交, 佢連聖班納都敢撩你就可想而知啦, 媽咪話流浪狗係咁喎, 佢地為左生存所以會好叻保護自己(咁我又唔係, 我都唔惡)…….

我仲記得4年前我剛剛番媽咪屋企冇耐, 就發現有一隻狗狗, 晚晚都四圍走, 成日攪到週圍d狗狗係咁吠(我當然係其中一隻), 媽咪仲話乜d人放狗咁冇公德心, 就咁由得佢四圍走……..點知如是者過左好多個星期, 先確定左佢其實係一隻流浪狗, 但佢又好企理播, 全身白色好乾淨, 媽咪自從知道佢係流浪狗之後, 佢既愛心又黎喇…….話佢可憐喎, 於是開始晚晚喂佢, 但果隻衰仔就好寸喇, 媽咪喂左成個月都係擺低d糧, 行開佢至埋黎食, 再喂左多一個月就只可以起佢身邊陪佢食…….但就摸唔到~~

不過有日見佢唔知點解突然污率率仲有小小傷, 媽咪諗住好心帶佢番黎洗白白, 跟住仲話不如收留埋佢陪我, 反正金仔果邊都冇消息…..其實我都好開心架, 我仲攞埋我隻米奇公仔比佢, 點知個衰仔唔領情, 洗完白白之後就吼住媽咪出街食飯時咬爛埋條狗帶擒欄走佬, 我都有叫住佢架, 不過佢都唔SO我, 拜拜都唔講就走左……..後來媽咪話既然佢鐘意自由自在都唔免強, 哈哈, 點知呢隻咁既衰虎起第2晚又走黎問媽媽攞野食, 真係比佢吹漲~~~

聽朱婆婆話都有幾家人話想收養佢, 不過虎虎根本唔食佢地d野更何況捉佢, 如是者又再過左成個月, 即2002年10月1日早上, 突然管理處明叔走黎同媽咪講話有人投訴, 捉狗車而家黎緊捉矮腳虎, 因為佢見媽咪喂佢, 所有通知一聲……

咁媽咪第一時間走去搵佢, 仲同佢講如果唔跟我地就比捉狗隊d人捉走, 佢都算知機, 好乖乖咁比媽咪抱入屋, 5分鐘唔夠, 果架捉狗車就到, 仲停正起我地個花園前面, 嘩…..有成4個大男人落車, 我都好驚, 我躲起媽咪後面, 聽到佢地話叫明叔一見到隻白色狗就call 佢地再黎過, Oh….總算鬆口氣~~~

果晚媽咪帶左虎虎去獸醫Body Check, 話如果佢身體OK就擺上綱睇有冇人收養, 不過我知佢都係講下, 米比我批中, 佢實養埋佢啫……
哈…講都冇人信, 真係風回路轉, 虎虎番黎2日之後個李Sir 居然抱金仔過黎話比我地, 忽然間得我一個變成3個 (大家唔好忘記屋入面仲有6隻貓貓朋友仔呢) 哈哈….今次真係好熱閙呀~~~~~
原本都好好地, 點知隻衰虎居然施下馬威, 佢3日唔埋就係咁咬金仔, 我當然唔比佢得珵啦, 話晒金仔變節都因為我, 我緊係要保護佢啦, 咁咪即係幫拖, 最初唔識打, 比佢咬到我差d破相冇左個靚仔樣, 佢衰到仲咬埋媽咪添, 後來我知到點還口, 咁結果味次次 我>>虎>>媽咪 都流晒血囉 >>>> 我真係唔想架, 媽咪又係既, 我地打緊就唔好揷手啦………….哎~~

頭果2個星期, 真係差唔多隔日就打, 媽咪都話頂唔順, 一於決定搵人收養矮腳虎, 點知……又發現虎虎有心絲蟲病, 冇法啦, 結果醫左佢成4個月而家好番晒喇, 佢牙…古古惑惑, 又識做, 又鬼咁癡媽咪, tum死佢喇, 正一追魂三步釘, 釘死媽咪, 結果當然係留番起度…….變左我既死對頭囉~~

不過而家佢都由隻猛虎….嘻嘻…..變番條地頭蟲啦喇, 講到底一齊都4年, 點都有感情既, 不過就一定唔會好似同金仔咁囉………..

樂樂B..寫於2006年4月18日


Winnie媽媽 | 18th Apr 2006 | 心肝寶貝狗狗~ | (8 Reads)

介紹比你地識, 我有一個好好兄弟….金仔, (一隻白色草羊仔….聽聞話係曲架混金毛, 但實情係乜就冇人知啦,因為一d都唔似), 佢好鍚我, 對我好忠心架, 成日跟住我, 我行佢唔會走, 我坐佢唔會企…..哈哈, 我係佢大佬囉, 佢返黎仲係我教佢去厠所添, 有時媽咪都呷我醋架, 不過諗番佢未黎我屋企之前既生活…..就係好坎坷囉, 相比起一隻流浪狗還不如, 唉~~~~

我仲記得我剛剛返屋企時,對面花園有隻狗狗成日不停吠,有時仲喊添, 都好煩架……聽媽咪話佢個主人是警察, 一個人住起我地斜對面, 唔知係太忙又或其他由(佢話金仔曳,周圍大小便,又咬野喎)???????? 金仔由1歲起後就一日24小時都困在一個好小既鐵籠裏面, 放在花園度, 日曬雨淋, 食無定時, 冇人理差唔多成一年多喇…….
果時除左我媽咪,仲有個朱婆婆啦,Cookie媽啦都好好心,一齊幫手照顧金仔, 有時喂佢食野, 有時幫忙洗籠, 好多時夜晚又偷偷地抱佢過嚟我地個花園度同我玩, 幫佢抹身啦, 朱婆婆仲成日同我講話我幾咁幸福, 其實我都唔太明乜野叫做幸福~~

不過後來媽咪話始終是長貧難顧, 個李Sir又冇叫我地地幫手, 如果佢間屋或隻狗有乜閃失, 真係都唔知搵邊個負責 ????? 而且可能好心做壞事, 個李Sir咪一路依賴晒其他人自已唔負責。
於是..........媽咪開始忍心唔再理金仔, 並寫咗封信比個衰人李Sir, 建議佢改善金仔的生活, 如果真係唔可以照顧不如將金仔送比人^^^^^^^^若果無人要就不如比我地 (嘻….如果係就好喇)~~~

嗚嗚~~~~~不過封信送出咗好耐…成個幾月都冇回音,我開始好掛住金仔呀,但媽咪又唔肯心軟.....好無奈咁見到金仔仍然困在籠中!!!!!!
有一晚, 朱婆婆突然走過黎同媽咪講話金仔已經3日唔肯食野,死狗咁瞓起個籠裏面, 打開個籠都唔肯出黎,叫媽咪快d過去睇下, 佢真係瘦左好多, 佢好嗲, 要媽咪用手喂佢先肯食, 原來佢都係好掛住我地…….嗚嗚~~~

唉…….我次次見到媽咪望住對面金仔個傷心樣, 我都唔知點安慰, 真係想走過去咬個衰人, 佢攪到我地個個都咁唔開心~~
正當在我地全部人狗都覺得冇希望放棄既時後, 唔知點解突然有一日金仔用頭撞又用牙咬爛個籠, 流曬血,披頭散髮咁逃走過來瞓起我花園門口度, 我都不知幾開心仲即刻叫媽咪快d收留金仔, 但媽咪話咁唔合法喎, 而果個衰人又即刻過來捉番佢走…….第2朝金仔又再逃走過來瞓起我地花園門口度………

嘻嘻~~~~再過左2日佢個主人就抱左金仔過黎話比媽咪啦……..個衰人仲要打圓場話原先一早都想比金仔媽咪喎, 大話精……我諗如果金仔唔係誓死逃走, 都唔知而家死左未, 金仔黎左我地屋企就黎4年喇(10月3日), 到時一於叫媽咪攪番個party至得, 好野又有得玩喇。
金仔…..你好叻仔呀, 我以你為榮, 幸福其實真係要自己爭取架……….

樂樂B..寫於2006年4月18日


Winnie媽媽 | 18th Apr 2006 | 心肝寶貝狗狗~ | (3 Reads)



我叫樂樂B, 又叫 lokbee, 今年4歲, 我個名既來源聽媽咪講係為紀念去左彩虹橋既姐姐 - 樂樂而改成, 佢成日都話果個樂樂乖過我架, 又話我係樂樂投抬, 真係short架, 我係仔, 佢係女….)我就一於借左聾耳陳隻耳聽唔到, 其實我應該係一隻地盤流浪狗, 但係我就冇乜印象….皆因我好細個已經比人執左入d流浪狗狗場, 更好好彩係一入狗場同日就比媽咪領養左返屋企喇, 所以一d唔開心既記憶都冇, 但後遺症就係唔知點解好細胆囉?????~~

我最初返到呢個屋企時覺得好怪, 屋入面既6個朋友仔同起街度果d完全唔同, 佢地係喵喵咁叫, 又細細隻成日跳上跳落, 佢地對我都好好既, 淨係fee幾下, 打幾下就自己走開, 又冇話咬我搶我d野食, 不過我就發現媽咪佢好偏心, 佢地d食物係好好味架, 我次次都偷食到停唔到口, 不過東窗事發之後就冇計囉……其實由地下轉為擺起飯枱我都仲可以跳到上去偷食, 但而家起雪櫃頂咁高, 唉.......都唔明佢地點可以跳到咁高, 又唔肯教我, 呢班friend都冇義氣囉~~

我媽咪….傻架, 佢成日話比人知我好靚仔, 每日對我起碼講成10次8次….嘻嘻, 不過我又好鐘意聽播, 諗諗下我又真係幾正, 我好叻仔架, 返左屋企唔使1日又唔使教都識得自己去厠所, 媽咪教親乜都一學即會, 所以媽咪Daddy當正我係佢地(No.1)心肝寶貝….哈哈哈哈~~~~

唔知係我太靚仔唔似唐狗, 定係d人唔相信會有傻婆帶隻唐狗周圍去玩, 所以成日都有人不停問我係乜品種, 哎呀…..答都答到悶晒, 不過經過媽咪好努力既介紹, 而家都有好多人識得我呢隻靚靚唐狗, 我仲有好多哥哥姐姐fans~~~

我bb果時除左同貓貓朋友仔一齊之外, 就只有同一隻毛毛米奇公仔渡過, (攪到有時我d行為動靜都學左貓貓) 皆因媽咪聽個唔知乜vet話未打齊針唔好帶我出街, 所以……好彩直至起我7個月大時, 金仔就變節投奔左黎我屋企, 嘩….超正….仲認埋我做大佬添(雖然佢仲老過我, 佢今年7歲喇), 嘻嘻…..從始我既生活就180度改變, 都不知幾多姿多彩, 開開心心~~~

不過美中不足就係果隻……衰仔矮腳虎, 矮得得, 古古惑惑咁, 成日癡實媽咪, 又同我打交爭寵, 最衰係唔肯好似金仔咁認我做大佬, 算啦….唔好提佢喇, 諗起都唔開心…..

講番我媽咪….佢真係傻架, 最近又收留多左2 隻貓貓起花園度, 又落晒order 咁唔比我地蝦佢喎, 唔係見一鑊打一鑊架, 話就話有愛心, 但係長始落去, 我真係怕佢遲早人又老, 錢又冇, 貓狗又走佬………..

樂樂B..寫於2006年4月18日


Winnie媽媽 | 10th Apr 2006 | 義工行動&感受~ | (2 Reads)

10/4/06

雄仔,一隻同我有一面之緣既唐狗已經起星期六因病走左


個心好唔舒服...好痛心.....仲有小小內疚


4年前當我入狗場領養狗狗時,義工曾極力推介過佢


佢比我既印象好乖,好純品,只因為佢係成狗好大隻


所以我冇考慮佢,而最終我地就領養左樂樂b....


可以講係有緣無份,又可以話佢冇呢個福份.......



雄仔前半生好慘,比pk主人用鐡錬鎖起渺無人跡既竹林內


幸運地比義工救左佢出黎,但上天弄人最終佢亦只有起狗場渡過佢既下半生


希望雄仔去到彩虹橋開開心心,下世千期唔好再做狗


就算要做,都做隻有人痛鍚有家既狗~~