香港新浪網 MySinaBlog
Winnie媽媽 | 1st Dec 2004 | 小天使~笨豬 | (9 Reads)


04年12月一隻病貓偷偷入左我個花園,亦同時進入我既生命
過左一個最寒冷既冬天,佢開始長出新毛覆蓋身上既傷痕

5月,我帶佢去desex同洗牙,不過同時經驗血知道佢有貓愛滋病
一個無藥可醫既絕症,更不幸係佢呢個病已經開始病發......
佢既口腔內已經完全潰爛,vet話無辨法亦無得醫

8月病毒更入侵佢雙眼變成失明,而病毒亦令佢腦神經受捐,間中control唔到4肢
但好快佢已經適應失明對佢既不便,而且仲好努力生存

10月病毒入侵佢尿道,佢支唇膏露左出黎收唔返而且受感染發炎潰爛
睇左幾個vet,食左幾個week抗生素都無效,Vet話都無能為力
最後獸醫話博一博,advise同佢做個大手術
就係變性手術(將尿道切短,開新的尿道口)
若果唔做既話,佢遲d有可能去唔到尿尿中尿毒
不過vet都話不抱樂觀,而且佢都唔敢做呢個手術
需要refer另外有經驗既去做........

經過我上網search資料同分析,更加上笨豬既身體狀況
我知道如果做呢個手術,佢可能捱唔到呢一刀,一去不返
就算過到手術呢關,佢都要面對手術後既復原同後遺症

於是我做左一個決定,我唔比佢受呢一刀之苦
既然vet已經幫唔到笨豬,我就只有用我自己方法
我幫佢試揸唔同藥膏,試食唔同既天然食品

曾經有朋友問我會唔會比佢安樂死
我答佢:安樂死到底是結束誰的痛苦和壓力?是貓貓本身,還是主人?

試過最辛苦既時侯,我有問過笨豬
我話我唔會握殺你既生命,我會尊重你,如果你覺得唔想再生存
我可以幫你,但如果你唔想放棄,我亦絕對唔會放棄你
聽完之後佢喵左我一聲..........

11月奇蹟地佢支唇膏終於可以收番埋,雖然仲未完全好晒
但至少又過左一個難關,佢好努力,好叻仔,好有生命力

距離2005年倒數仲有19日
但係我既心就好似打番5味架一樣
曾經講過希望笨豬仔能夠同我過聖誕又過新年
但我又真係好擔心,過左呢個日子之後佢就會走

佢個身體真係好虛弱,但就好嗲好乖同痴身
前晚瞓到半夜真係比佢嚇死,幾乎以為佢就咁就走
好彩我既狗狗樂B叫醒我,呢次都係我第1次見佢抽筋
我無驚慌,但就係好心痛同好無助
佢抽完筋之後,成個身好輕好攰同無力
我就抱住佢好似抱BB咁坐到天光,一路同佢講一路喊

其實佢抽筋既次數係一日比一日多,不過好多時我都唔見
只是從地上既血蹟同佢瞓覺既地方亂晒估到

今朝早又比我見到佢抽筋,而家只希望佢唔好辛苦
亦希望奇蹟再可以出現

小笨豬呀.....我個心肝寶貝,你要努力呀
就算真係要做貓天使都唔使怕
記住…媽媽真係好錫好錫你架!!

******************************

2006年1月13日零辰1點30分
我心愛既笨豬終於離我而去
佢去得好安祥,完全冇任何痛楚
就像一個甜睡既嬰兒般,好滿足好安心咁離去